Reyklaus í mánuð!

Í gær náði ég þeim áfanga að hafa verið reyklaus í einn heilan mánuð! Ég klappa sjálfri mér á bakið og hrósa mér í hástert fyrir dugnaðinn. Samt er eitthvað skrítið við þetta, það getur ekki verið svona auðvelt að segja skilið við eiturpúkann sem setið hefur þrútinn af nikótíni á öxl minni í 39 ár. Það hlýtur að koma að einhverjum verulega erfiðum þröskuldi til að klifra yfir áður en langt um líður – eða hvað?

Eina verulega erfiða stundin var þegar ég fór inn á hælið í Hveragerði og skellti á eftir mér. Það var ömurlega erfitt að yfirgefa bílinn, henda sígarettum og kveikjara og druslast inn með töskuna. Ég þurfti að rífast hástöfum við sjálfa mig í langan tíma áður en það tókst. En um leið og inn var komið var þetta bara ekkert mál. Og hefur varla verið síðan. Guð láti gott á vita.

Ég geri það að gamni mínu á morgnana að leggja bílnum á mínus 3. hæð í bílastæðahúsinu við hliðina á vinnunni minni og hlaupa upp stigana, alla leið upp á plús aðra hæð og finna hvernig þolið eykst dag frá degi.

Og það yljar óneitanlega að kíkja í heimabankann og sjá sparnaðarreikninginn sem kominn er í 36.000 kr. eftir þennan eina mánuð!

Athugasemdir

[Guðmundur L Þorvaldsson (IP-tala skráð) 26.3.2007 kl. 18:15]

Frábært, til hamingju með áfangan.

[Vilborg Valgarðsdóttir, 27.3.2007 kl. 10:39]

Takk Gummi minn og til hamingju sjálfur með eins árs og eins mánaðar reykleysis-afmælið! Við sláum okkur saman á næsta ári þegar ég á eins en þú tveggja ára afmæli og gerum eitthvað skemmtilegt!

[Guðmundur L Þorvalddson (IP-tala skráð) 27.3.2007 kl. 13:38]

Samþykkt.

[Halla (IP-tala skráð) 28.3.2007 kl. 11:03]

Húrra fyrir þér og reykleysinu ljúfan mín! Sparnaðarreikningurinn er líka flott mál og getur komið sér vel þegar útþráin grípur þig;-)